İsmayıllının təhsil uğurlarına həsr olunmuş möhtəşəm “Təhsil bayramı” keçirilib

Dövlət təhsil siyasətinin həyata keçirilməsində uğurlarını ilbəil artıran, ümummilli liderimiz Heydər Əliyevin “Təhsil millətin gələcəyidir” deyiminə  və illər öncədən formalaşmağa başlanmış ənənələrə əsaslanan İsmayıllı rayonunun təhsil sistemi bu il də tam orta məktəb məzunlarının ali məktəblərə qəbulu zamanı  diqqətəlayiq nəticələr əldə edib. Bu nəticələr 28 avqust 2019-cu il tarixdə ənənəvi “Təhsil bayramı”nda qeyd edilib, yüksək nailiyyətlərə çatmaq yollarına bayram əhval-ruhiyyəsi ilə nəzər salınıb.
          Universitetlərə qəbul zamanı  İsmayıllı tam orta məktəb məzunları Respublika miqyasında  fərqli nəticələrə çatmaq üçün hansı yolları qət ediblər? İlk olaraq qeyd olunmalıdır ki, həyat fəaliyyətinin bütün istiqamətlərində olduğu kimi təhsil siyasəti ilə bağlı da Azərbaycan Respublikasının Prezidenti İlham Əliyevin Sərəncam, tapşırıq, göstəriş və tövsiyələri rayonda məsuliyyətlə icra olunur. Məktəblərin maddi bazası möhkəmləndirilir, müəllimlərin iş şəraiti yaxşılaşdırılır, hər bir pedaqoji işçinin uğuru təqdir olunur, mükafatlandırılır, daha fərqliləri fəxri adlara və təltiflərə təqdim olunur. İsmayıllı Rayon İcra Hakimiyyətinin rəhbərliyi ayda bir dəfə ümumitəhsil məktəblərində tədris şəraitini, yanacaqla təchizatı, zamanı gələndə yeni dərs ilinə hazırlığın, qış mövsümünün gedişinin mövcud durumunu öyrənir, təhlillər aparır və növbəti vəzifələri müəyyənləşdirir. Məktəblərin tikintisi və təmiri, dərsliklərlə, yanacaqla təminat  xüsusi diqqətdə saxlanılır. Ötən illərdə rayonda çoxsaylı məktəblər tikilib. Onlar barədə yox, yalnız bu ilə istinadən qeyd edirəm ki, Azərbaycan Respublikası Prezidentinin Sərəncamı ilə Basqal qəsəbəsində 432 yerlik, Heydər Əliyev Fondu tərəfindən Gəraybəyli kəndində 320 yerlik, Uştalqışlaq  və Girk kəndlərində  modul tipli  məktəblər tikilir. Məktəblərin 4-ü də yeni tədris ilinin başlanğıcına qədər hazır olacaqdır. 26 avqust 2018-ci il tarixdə Prezident İlham Əliyev  və  Heydər Əliyev Fondunun Prezidenti  Mehriban xanım Əliyeva orjinal layihə əsasında tikilmiş Lahıc qəsəbə tam orta  məktəbinin açılışını etmişdirlər. Burada ölkə rəhbərinin dediyi fikirlər icra hakimiyyəti və təhsil işçiləri tərəfindən fəaliyyət proqramı kimi qəbul edilmişdir və  ardıcıl, sistemli olaraq icrası təmin olunmaqda davam edir.İsmayıllı təhsilinin ümumilikdə əldə etdiyi nailiyyətləri növbəti təhlili yazı üçün saxlayıb ali məktəblərə qəbulun nəticələrinə diqqəti cəlb etmək istərdim.
           İsmayıllı rayonunda 46 tam, 23 ümumi orta və 10 ibtidai  məktəb fəaliyyət göstərir.2019-cu ildə tam orta məktəbləri 765 nəfər bitirib. Onların 546 nəfəri qəbul imtahanları üçün sənəd verib.75 nəfər sənəd verən isə keçən illərin  tam orta məktəb məzunlarıdır. 400 nəfər imtahanlardan uğurla çıxaraq tələbə adını qazanıb. 16 nəfər 600-dən çox, 65 nəfəri 500-600 arası bal toplayıb. 2017-2018-ci illərdə ali məktəblərə qəbulun nəticələrinə görə İsmayıllı rayonu kənd rayonları arasında ikinci yerdə olub. Rəsmi nəticələr elan olunana qədər yalnız onu demək istərdim ki, sıralamada bu il də geriləmə olmayacaq.
         Haqlı olaraq İsmayıllı Rayon İcra Hakimiyyətinin təşkilatçılığı və rayon təhsil şöbəsinin iştirakı ilə “Təhsil bayramı” keçirmək bu il də qərara alınıb. İsmayıllı şəhərinin Mərkəzi  meydanı 28 avqustda növbəti, hamının sevincinə səbəb olan “Təhsil bayramı” üçün məkan seçilib. Ali məktəblərə yeni qəbul olunan tələbələr, valideynlər,pedaqoji kollektivlər, ictimaiyyət nümayəndələri, gənclər, əvvəllki illərdə yüksək bal toplamış  tələbələr, müxtəlif təşkilatlardan olan və özəl qonaqlar,Belorus Respublikasının Nesvij şəhərindən gələn nümayəndə heyətinin üzvləri bu məkana toplaşmışdılar.
          İştirakçılardan bir qrupu əvvəlcə ümummilli lider Heydər Əliyevin abidəsini ziyarət edib,önünə gül dəstələri qoyublar.
         Bayram tədbirini giriş nitqi ilə təhsil veteranı,rayon ağsaqqallar şurasının sədri Valeh Salehov açıb.
         İsmayıllı Rayon İcra Hakimiyyətinin başçısı Mirdaməd Sadıqov çıxış edərək çoxsaylı qonaqlarla birlikdə tədbir iştirakçılarını salamlayıb, daha sonra dövlət təhsil siyasətinin rayonda yüksək səviyyədə həyata keçirilməsindən, bu sahənin arzuolunan nəticələrə gətirib çıxarmasından, ümumi təhsil məktəblərində, Peşə Tədris Mərkəzində, İsmayıllı Dövlət Humanitar və Texnologiya kollecində çalışan müəllimlərin səmərəli işindən danışıb.  Minnətdarlıqla bildirib ki, bütün bunlar Azərbaycan Respublikasının Prezidenti cənab İlham Əliyevin xalq və Dövlət maraqları üzərində qurulan, vətəndaş məmnunluğu yaradan siyasətinin, gələcəyimiz olan təhsilə hərtərəfli qayğısının nəticəsidir.
Çıxışının sonunda Mirdaməd Sadıqov “Təhsil bayramı” münasibətilə hamını təbrik edib.
Millət vəkili Novruz Aslanov “Təhsil bayramı”nın təşkilatçılarına, məhsuldar əməyinə görə müəllimlərə, yüksək bilik nümayiş etdirən tam orta məktəb məzunlarına təşəkkürünü bildirib. Bayram münasibətilə tədbir iştirakçılarını təbrik edib.
           Rayon təhsil şöbəsinin müdiri Rasim Orucov ilin təhsil nəticələrinə həsr olunmuş çıxış edib.
           Ağlın, ayıq düşüncənin, yeni təfəkkürün, biliyin təntənəsi olan “Təhsil bayramı”nda yüksək bal toplayan məzunlar,valideynlər,ictimaiyyət nümayəndələri, uğurları ilə daha çox diqqət cəlb edən məktəblərin nümayəndələri  çıxışları ilə bayram sevincinə sevinc qatıblar. Bayram şənliyi mahnılar, rəqslər, folklor qruplarının çıxışları ilə müşaiyət olunub. Rayonun təhsil, kənd təsərrüfatı istehsalı, mədəniyyət və incəsənətini əks etdirən sərgiyə iştirakçılar maraqla tamaşa ediblər.
           Bayram şənliyi “Qala” şadlıq sarayında davam etdirilib. Buraya rayon icra hakimiyyətinin əməkdaşları, ictimaiyyət nümayəndələri, veteran müəllimlər, pedaqoji fəaliyyətdə daha çox nailiyyətləri olan müəllimlər, məktəb direktorları, qonaqlar, 500-dən yuxarı  bal toplayan 81 nəfər məzun, qonaqlar-cəmi 300 nəfər dəvət olunub.
           Tədbiri giriş nitqi ilə  Əməkdar müəllimlər Şəfaqət Rəsulov və Mirvari Musayeva açıblar. Rayon İcra Hakimiyyətinin başçısı Mirdaməd Sadıqov yenicə tələbə adını qazanmış gəncləri, onların valideynlərini, müəllimlərini təbrik edib. Kamil mütəxəssis kimi yetişməkdə  onlara uğurlar arzulayıb. Belorusdan gələn qonaqların nümayəndəsi danışıb. 81 nəfər yüksək bal toplayan tələbə-gəncə RİH-nin hədiyyəsi və təbrik mətni təqdim olunub. Universitetlərə qəbulda məzunları daha çox fərqlənən məktəblərin direktorları, sinif rəhbərləri və aparıcı fənn müəllimləri mükafatlandırlanlar sırasında olublar. Şəhər 7 saylı məktəbin məzunu, 661 bal toplayan Ayla Yusifli və 651 bal toplayan Sevinc Babazadə, şəhər 1 saylı məktəbin məzunu, 652 bal toplayan Nərmin Nemətli rayon üzrə ən yüksək bal topladıqlarına görə xüsusi mükafata layiq görülüblər.
        Muğam müsabiqəsi qalibi Kamilə Nəbiyeva, Əməkdar mədəniyyət işçisi Aşıq Ağamurad İsrafilov, “Tərəqqi” medallı Sahibə Abdullayeva və başqalarının oxuduqları mahnılar, ifa olunan rəqslər bayram təntənəsini daha da rövnəqləndirib.
      “Təhsil bayramı” axşam saat 1700-da Heydər Əliyev parkında möhtəşəm konsertlə yekunlaşıb. Uğurları ilə valideynlərinə müəllimlərinə sevinc gətirən məzunlar İsmayıllı sakinlərinə daha bir bayram günü yaşadıblar.