“Zirə”yə texniki məğlubiyyət verilə bilər

14:05 16-09-2018 | 3416

“Zirə”yə texniki məğlubiyyət verilə bilər.

Topaz Premyer Liqasının IV tur qarşılaşmasında “Səbail”lə səfərdə görüşən “Zirə”nin təqdim etdiyi protokolda 1998-ci il təvəllüdlü və daha gənc bir futbolçunun adı göstərilməyib. Bu isə Əsasnaməyə ziddir.

İndi qalır AFFA-nın İntizam Komitəsinin rəsmi qərarını gözləmək. Lakin bütün hallarda, nəticə ləğv oluna və “Zirə”yə texniki məğlubiyyət verilə bilər.

Qeyd edək ki, “qartallar”ın PFL-ə təqdim etdiyi iştirak ərizəsində həmin limitə uyğun gələn - 1998-ci il təvəllüdlü yeganə futbolçu Aqşin Quluzadədir. Yay fasiləsində “Keşlə”dən cəlb olunan 20 yaşlı yarımmüdafiəçi əvvəlki 2 matçda “Zirə”nin matç üçün protokolunda olub. “98 nömrə”li formanı daşıyan Aqşin bu dəfə oyuna sifariş olunmayıb. Maraqlısı odur ki, o, 45 dəqiqə ehtiyat oyunçular skamyasında oturub. Ancaq adı matçın iştrak ərizəsinə daxil edilməyən futbolçunun necə ehtiyatda olması, bunu qarşılaşmanın hakim-inspektoru Fazil Mürşüdovun necə görməməsi qaranlıq qalır.