“Bizə qarşı haqsızlıq oldu” - Ramil Şeydayev

19:47 26-11-2018 | 4051

“Əsas heyətdə meydana çıxacağımı qarşılaşmadan bir neçə gün əvvəl bilirdim. Əlbəttə, həyəcanlı idim. Amma bu, tez də keçdi. Start fitindən sonra özümü tamamilə matça köklədim”. Bu sözləri "Krılya Sovetov"un futbolçusu Ramil Şeydayev klubun rəsmi saytına açıqlamasında deyib.

Rusiya Premyer Liqasının XV turunda Moskva “Spartak”iyla 90 dəqiqə oynadığı səfər məğlubiyyətini (1:3) şərh edən milli komandamızın hücumçusu örüşün baş hakimini ədalətsiz qərarlar verməkdə günahlandırıb: “Hətta bir epizodda ötürməmdən sonra top rəqib futbolçunun əlinə dəydi, referinin penalti nöqtəsini göstərmədi. Həqiqətən qayda pozuntusu var idi, təkrarda da hər şey açıq-aydın görünürdü. Nə deyəsən... Bugünkü matçda bizə qarşı çox haqsızlıq oldu. Amma digər tərəfdən də düşünürsən ki, hakim də insandı, o da səhv edə bilər. İlk qolu buraxdıqdan dərhal sonra qapımızda ikinci topu gördük. Görünür, rəqibin ardıcıl 2 dəfə bizi məyus etməsi konsentrasiyanı itirdiyimizlə bağlı idi”.

Ramil 14 xalla 13-cü pillədə olan komandasının qış fasiləsinə qədər çempionatda qalan hər 2 oyununun önəmli olduğunu xatırladıb: “Hər iki qarşılaşma çətin olacaq. Yalnız öz oyunumuzu düşünməliyik. Yaxşı oynasaq da ,nəticələr nə bizi, nə də azarkeşləri qane edir. Ümid edirəm ki, qarşıdakı həlledici görüşlərdə özümüzü bir az daha yaxşı tərəfdən göstərəcəyik”.

Qeyd edək ki, Şeydayev Moskvadakı matçda 83-cü dəqiqədə sarı vərəqə ilə cəzalandırılıb.