Dostluğun və birliyin parlaq təzahürü

          Azərbaycan Prezidenti cənab İlham Əliyev mayın 30-da İsrail Prezidenti İshaq Hersoqla görüşündəki bəyanatında qeyd edib ki, ölkəmizdə digər millətlərin nümayəndələri ilə yəhudilərin  sıx birliyi mövcuddur. Dövlətimizin başçısı deyib: “Yəhudi icması Azərbaycanda əsrlər boyu yaşayıb. Bu, bizim ölkənin böyük dəyəridir, yəhudi icmasının üzvləri - Azərbaycan vətəndaşları ölkəmizin müasir inkişafına çoxlu töhfə vermiş və töhfə verən insanlardır. Azərbaycanda yaşayan yəhudi qardaşlarımız ölkəmizin ərazi bütövlüyü uğrunda azərbaycanlılarla birgə çiyin-çiyinə vuruşublar. Onlar bizim müstəqilliyimiz və ərazi bütövlüyümüz uğrunda bizimlə və bütün digər azlıqların nümayəndələri ilə birgə vuruşublar. İsraildə yaşayan azərbaycanlılar ölkələrimiz arasında körpülərin qurulmasında mühüm rol oynayırlar.

         “Sirr deyil ki, ölkəniz əhalisinin əksəriyyəti şiələr olan müsəlman ölkəsidir. Buna baxmayaraq, millətlərimiz arasındakı sevgi və bağlılıq dünyanı necə dəyişdirə biləcəyimizin və irəli gedə biləcəyimizin nümunəsidir. İndicə səhiyyə nazirlərimiz arasında şahidi olduğumuz mərasim, cənab Prezident, Sizin qeyd etdiyiniz kimi, əməkdaşlıq üçün nə qədər məsələ və sahənin olmasının daha bir nümunəsi və təcəssümüdür”,  - bu  fikri isə İsrail lideri bildirib.

        Bizim dünya azərbaycanlılarının diaspor təşkilatları var, lakin yalnız bir ölkədə, İsraildə bu təşkilat əsasən yəhudi mənşəli insanlardan ibarətdir. Təkcə İsraildə deyil, dünyanın müxtəlif ölkələrində yaşayan yəhudi mənşəli azərbaycanlılar Azərbaycan diasporunun işində fəal iştirak edir, Azərbaycanın haqlı mövqeyini dəstəkləyirlər. Bu, aramızda heç bir fərqin, heç bir bölgünün olmadığını nümayiş etdirir. Müstəqil ölkə olaraq Azərbaycanın sadəcə 31 yaşı var, lakin bizim əsrlər boyu davam edən qarşılıqlı əlaqələr, dostluq və qarşılıqlı dəstək tariximiz var, qədim tariximiz var.  Azərbaycandakı yəhudilər həmişə cəmiyyətimizin fəal və mötəbər hissəsi olmuşlar və bu gün də belə olmaqda davam edirlər. Mədəni körpülərin bizim ikitərəfli strateji əməkdaşlığımıza töhfəsi çox vacibdir.

        "Tarix göstərir ki, yəhudi xalqı ilə azərbaycanlılar arasında münasibətlər dərin köklərə malikdir. Yüz illərdir ki, Azərbaycan yəhudiləri Azərbaycan mədəniyyətinin və siyasətinin zəngin toxumasının bir hissəsidir. Dinlərarası əməkdaşlıq, mədəniyyətlərarası tolerantlıq, hörmət irsi bu dövrdə xalqlarımız üçün zamanın tələbidir və hamımızın dünyaya verdiyi hədiyyədir", - görüş zamanı Hersoq qeyd edib.

        Bütün bunlar bir daha sübuta yetirir ki, multikultiralizm və Vətən sevgisi Azərbaycanla bağlı olan bütün insanlara xas xüsusiyyət olmaqla yanaşı, bizi birləşdirən ən böyük dəyərdir.

       Gülayə Məmmədova,

Cəlilabad rayon Göytəpə şəhər

1 saylı körpələr evi-uşaq bağçasının müdiri