Fərid Novruzi: “2008-ci ildə ölkəmizdə çimərlik futbolunu sıfırdan yaratmışıq”

04:49 05-07-2023 | 766

“Bakıda gözəl tədbir keçirilir. Seçmə mərhələnin paytaxtımızda təşkil olunması bizim üçün nailiyyətdir”.

Bunu Azərbaycan Çimərlik Futbolu Federasiyasının prezidenti Fərid Novruzi Bakıda təşkil olunan çimərlik futbolu üzrə dünya çempionatının Avropa üzrə seçmə mərhələsi çərçivəsində təşkil olunan mətbuat konfransında deyib.

Federasiya rəhbəri seçmə mərhələdə milli komandadan uğur gözlədiyini bildirib:

“2008-ci ildə ölkəmizdə çimərlik futbolunu sıfırdan yaratmışıq. Hamımız birlikdə öyrənmişik. Geri baxanda çox böyük işlər görmüşük. Son Avropa Oyunlarında beşinci yeri tutmaq böyük nailiyyətdir.

Ümumilikdə Avropada onuncuyuq. İnanırıq ki, milli komanda seçmə mərhələdə də hamımızı sevindirəcək”.

O, milli komandadan dünya çempionatının final mərhələsində vəsiqə gözlədiklərini əlavə edib:

“Gözləntimiz final mərhələsinə vəsiqə qazanmaqdır. Avropa Oyunları da komanda üçün bir növ hazırlıq oldu. Ümid edirəm, o motivasiyanı saxlayaraq, istəyimizə nail olarıq”.