Laçın “gözəl” mənasını verir, gələcəyi daha gözəl olacaq

Bütün dünya ictimaiyyəti yaxşı bilir ki, Ermənistan bizim torpaqlarımızdan öz xoşu ilə
çıxmaq istəmirdi, işğal edilmiş torpaqlardan çıxmaq istəmirdi. Sadəcə olaraq, görüntü
naminə, beynəlxalq vasitəçiləri aldatmaq üçün, beynəlxalq ictimaiyyəti çaşdırmaq
üçün belə bir təklif irəli sürürdü ki, guya onlar beş rayonu qaytarmağa hazırdırlar,
ancaq Laçın və Kəlbəcər onların əlində həmişəlik qalmalıdır. Müzəffər Azərbaycan
Ordusunun qəhrəmanlığı sayəsində Azərbaycan qalib oldu. Azərbaycan Ordusu
düşməni döyüş meydanında məğlub edib.
Azərbaycan xalqı özü beynəlxalq qanunların aliliyini və tarixi ədaləti bərpa
etdi. Vətən müharibəsində əldə etdiyimiz qələbə nəticəsində imzalanmış üçtərəfli
bəyanata əsasən, dekabrın 1-də Laçın rayonu Azərbaycana təhvil verilib.
Prezident İlham Əliyev bu il avqustun 26-da Laçın Şəhər Günü bayramında
Laçınlılar qarşısında etdiyi çıxışda tutarlı dəlil-sübutlar gətirərək göstərib ki,
danışıqlar aparılan müddətdə iqtisadiyyatımızı gücləndirdik və bu gün heç kimdən
asılı deyilik. Dünya miqyasında nadir ölkələrdənik ki, iqtisadi cəhətdən tam
müstəqilik. Siyasi gücümüzü artırdıq, bu gün Azərbaycanla hesablaşırlar. Ən azı
regional təhlükəsizlik və inkişaf məsələlərində Azərbaycanın razılığı olmadan heç bir
təşəbbüs həyata keçirilə bilməz. Bu gün dünya miqyasında bir çox məsələlərdə
Azərbaycanın mövqeyi önəmli mövqe kimi sayılır.
2021-ci ildə Laçın rayonunda generasiya gücü 8 meqavat olan Güləbird Su
Elektrik Stansiyası işə salınıb. Bu stansiya təxminən 7000 nəfər əhalinin elektrik
enerjisi ilə təminatında mühüm rol oynayacaq. Burada istehsal olunan elektrik
enerjisi Qubadlı rayonunun Xanlıq kəndini, Laçın rayonunun cənub hissəsini və
ərazidə yerləşən digər infrastruktur layihələrini elektrik enerjisi ilə təmin edəcək.
Laçın rayonunda Həkəri çayının ən böyük qolu olan Hoçaz çayı üzərində yerləşən və
ermənilər tərəfindən tamamilə dağıdılan 14,25 meqavat gücündə “Ağbulaq”, 8,25
meqavat gücündə “Mişni” və 6 meqavat gücündə “Alxaslı” Su Elektrik stansiyaları
Prezident İlham Əliyevin tapşırığına uyğun olaraq tam yenidən qurulub. Hazırda
“Ağbulaq” Su Elektrik Stansiyasında artıq son tamamlama işləri aparılır. “Mişni” və
“Alxaslı” Kiçik Su Elektrik stansiyaları 2023-cü il avqustun 25-də işə salınıb. Bu
günədək Laçın rayonunda ümumi gücü 40,5 MVt, illik enerji istehsalı potensialı 120
milyon kilovat-saat olan 5 kiçik su elektrik stansiyası yenidən qurularaq istismara
verilib. Hazırda 4 stansiyanın yenidən qurulması üzrə işlər davam etdirilir. Gələn ilin
birinci rübündə artıq Laçın rayonunda ümumi gücü 65,5 MVt, illik elektrik enerjisi
istehsal potensialı 194 milyon kilovat-saat olan 9 su elektrik stansiyası fəaliyyət
göstərəcək.
Cari ilin aprel ayında Azərbaycan-Ermənistan sərhədinin Laçın istiqamətində
sərhəd-buraxılış məntəqəsini quraraq öz ərazi bütövlüyümüzü tam bərpa etdik.
Sərhəd-buraxılış məntəqəsi son məntəqə idi ki, Ermənistandan Azərbaycanın
Qarabağ bölgəsinə və əks istiqamətə oradan nəzarətsiz hərəkət var idi. Hərəkət indi
də var, amma tam nəzarət altındadır. Dostlarımız da, düşmənlərimiz də bilsinlər ki,
gözəl Laçının gələcəyi daha da füsunkar olacaq.
Qəzənfər Ağayev
Cəlilabad şəhər sakini, Vətən müharibəsi qəhrəmanı