Misilsiz zəka və düha sahibi

       1993-cü ilin oktyabr ayında keçirilmiş prezident seçkilərində dahi şəxsiyyət Heydər Əliyev Azərbaycana rəhbər seçildi. Həmin gün Azərbaycanı yüksəlişə, inkişafa aparan yolun başlanğıcı idi

       Bütün şüurlu həyatını ölkəmizin çiçəklənməsinə həsr etmiş Heydər Əliyevin müqəddəs ideyaları artıq neçə illərdir ki, uğurla həyata keçirilir. Bu illər ərzində iqtisadiyyatın inkişafı, əhalinin sosial vəziyyətinin yaxşılaşdırılması, yeni iş yerlərinin yaradılması, şəhər və kəndlərin abadlaşdırılması və müasirləşdirilməsi sahələrində elə nailiyyətlər qazanılmışdır ki, bunları əvvəlki illərdə müşahidə etməmişdik. İndi razılıqla qeyd etmək olar ki, Heydər Əliyevin qurduğu təməl üzərində yeni-yeni tədbirlər həyata keçirilir, müstəqilliyimizin qorunmasına çox mühüm önəm verilir.

        Heydər Əliyev Cəlilabad camaatının da sevimlisidir. Onun ayağı dəyən hər bir guşə insanların and və güman yeridir. Parlaq düha sahibi bu hörmət-izzəti  hələ sağlığında özünün pak əməlləri və tükənməz qayğıkeşliyi ilə qazanmışdır. O, bir  neçə dəfə rayonumuzda olmuş, kənd təsərrüfatı və digər sahələrdə çalışan insanlarla görüşərək onların problemləri ilə maraqlanmış, bu problemlərin həlli istiqamətində zəruri addımlar atılmış, təxirəsalınmaz tədbirlər həyata keçirilmişdir. Onun böyük diqqət və qayğısı sayəsində Cəlilabad  rayonunun sosial-iqtisadi, mədəni və digər sahələrində yüksək irəliləyişlərə nail olunmuş, neçə-neçə həmyerlimiz Sosialist Əməyi Qəhrəmanı kimi yüksək fəxri ada, dövlət mükafatlarına layiq görülmüş, müxtəlif orden və medallarla təltif olunmuşlar. Bu gün rayonda əldə edilən nailiyyətlər, dinamik yüksəliş, uğurlu göstəricilər məqsədyönlü şəkildə aparılan islahatların  nəticəsidir. Son illər əhalinin rifahının daha da yaxşılaşdırılmasında, yeni iş yerlərinin açılmasında, təhsil, səhiyyə, mədəniyyət ocaqlarının maddi-texniki bazasının möhkəmləndirilməsində möhtəşəm işləri görməmək mümkün deyildir. Mühüm iqtisadi layihələrin həyata keçirilməsi ilə paralel olaraq sosial proqramlar ardıcıl surətdə yerinə yetirilir, insanların daha firavan yaşaması üçün tədbirlər görülür. Buna görə də Azərbaycanın bütün oğul və qızları kimi, rayonumuzun sakinləri də müstəqillik və istiqlaliyyət ideyalarını göz bəbəyi kimi qorumalı, yaşatmalı və ulu öndərimizin amallarını ləyaqətlə həyata keçirməlidir. Unutmayaq ki, bizim bu günümüz kimi, sabahımız da ulu öndərimizin ideyalarıı üzərində köklənib və  biz  həmin ideyaların işığında daha da irəli gedəcəyik.

        Beləliklə, Heydər Əliyevin siyasi hakimiyyətə gəlişi  ölkəmizin tarixində möhtəşəm hadisədir, bizlərə və gələcək nəsillərə inkişaf üçün sarsılmaz bir təməl olmuşdur. İndi  respublikmızın hər sahədə qazandığı uğurlara görə birinci növbədə Heydər Əliyev dühasına minnətdarıq. O, doğma xalqın milli şüurunu dirçəldərək, onda gələcəyə tükənməz ümidlərlə baxmaq vərdişi yaratdı, Azərbaycan xalqının malik olduğu potensialın, enerjinin daşıyıcısı olmaqla bu keyfiyyətlərin  parlaq nümunəsi oldu. Məhz həmin keyfiyyətlər demokratik, hüquqi, dünyəvi dövlətin bərqərar olmasında və inkişafında mühüm rol oynadı.

    Hafiz Əliyev,

  Cəlilabad Rayon İcra Hakimiyyəti başçısının

   Üçtəpə kənd İnzibati Ərazi Dairəsi üzrə Nümayəndəsi