AHİK-də Müstəqilliyin Bərpası Günü münasibətilə tədbir keçirilib

Azərbaycan Həmkarlar İttifaqları Konfederasiyasında (AHİK) 18 Oktyabr -
Müstəqilliyin Bərpası Günü münasibətilə tədbir keçirilib.
Tədbirdə AHİK-in rəhbərliyi və kollektivi, üzv təşkilatların sədrləri və məsul
əməkdaşları, həmçinin KİV nümayəndələri iştirak ediblər.
Öncə şəhidlərimizin əziz xatirəsi bir dəqiqəlik sükutla yad edilib.
AHİK sədri, Milli Məclisin deputatı Səttar Möhbalıyev çıxış edərək Azərbaycanın
dövlətçilik ənənələrindən, xalqımızın işğalçılara qarşı tarixən apardığı azadlıq
mübarizələrindən, Ulu Öndər Heydər Əliyevin dövlətimizin müstəqilliyinin
qorunması və möhkəmləndirilməsi istiqamətində gördüyü işlərdən danışıb. Bildirib ki,
Azərbaycan 5 min illik dövlətçilik ənənələrinə sahibdir: “Böyük Ermənistan”
xülyasını ortaya atan ermənilər hesab edirlər ki, guya onların böyük dövlətləri olub, bu
torpaqlarda qədimdən yaşayıblar. Bu iddiaların hamısı fantaziyadır. Ona görə ki,
ermənilər bura sonradan köçürülüb, bu ərazilərlə bağlı onların tarixi 19-cu əsrdən o
tərəfə getmir. Bugünkü Ermənistanın başqa dövlətlər tərəfindən, özü də Azərbaycan
torpaqlarında yaradıldığı hamıya məlumdur. Odur ki, Ermənistanın öz boyundan
hündürə tullanmaq cəhdi faydasızdır. Çünki Ermənistandan fərqli olaraq bizim dövləti
5 min illik dövlətçilik təcrübəsi olan Azərbaycan xalqı yaradıb və tam müstəqil
şəraitdə yaşayır”.
AHİK sədri qeyd edib ki, şərqdə ilk demokratik respublikanı da 1918-ci ildə bizim
xalqımız yaradıb: “Həmin vaxt dünyanın bir çox yerlərində, o cümlədən Avropanın
bəzi ölkələrində istibdad hökm sürürdü, totalitar siyasi rejimlər hakim idi. Azərbaycan
Xalq Cümhuriyyəti bütün ölkə vətəndaşlarına eyni hüquqlar verdi, irqi, milli, dini
bərabərsizliyi aradan qaldırdı, qadınlara seçki hüququ verildi”.

“Ulu Öndər Heydər Əliyevin ötən əsrin 70-ci illərində gördüyü strateji işlərin əsasını
müstəqil yaşamağı bacaran, özünü hərtərəfli təmin edə bilən Azərbaycana nail olmaq
təşkil edirdi. Bununla o, müstəqilliyə gedən yolun təməlini qoymuş oldu. 1990-cı ildə
Heydər Əliyevin sədrliyi ilə Naxçıvan parlamenti Muxtar Respublikanın adından
"Sovet Sosialist" sözlərini yığışdırdı, ilk dəfə üçrəngli bayrağımız qaldırıldı. Bu, o
dövr üçün son dərəcə cəsarətli addım idi. 1991-ci il oktyabrın 18-də Azərbaycan xalqı müstəqilliyini bərpa etdi. Amma müstəqilliyin ilk illəri dövlətimiz üçün o qədərdə uğurlu olmadı, ölkənin ictimai-siyasi həyatında ağır böhran hökm sürürdü.
Müstəqilliyimiz itirmək təhlükəsi yaranmışdı. Xalqın təkidli tələbi ilə təcrübəli
siyasətçi Heydər Əliyevin hakimiyyətə gəlməsi nəticəsində müstəqilliyi qorumaq və
inkişaf etdirmək mümkün oldu”, - Milli Məclisin deputatı vurğulayıb.
Onun sözlərinə görə, bu gün Ulu Öndər Heydər Əliyevin siyasi irsinin layiqli
davamçısı Prezident İlham Əliyev siyasi ənənələrə və dövlətin qorunmasının ali
prinsiplərinə uyğun olaraq misilsiz islahatlar həyata keçirir, ölkəmiz hüququn aliliyi,
demokratiya və dünyəvilik prinsipləri üzərində qurulmuş müstəqil dövlət kimi öz
inkişafının ən parlaq dövrünü yaşayır.
Konfederasiya sədri əlavə edib ki, biz müzəffər xalqıq, bizim müstəqil və qalib
dövlətimiz var, ölkəmizin bütün ərazisində dövlətimizin suverenliyi tam təmin olunub:
“Artıq üçrəngli bayrağımız Xankəndidə, Ağdərədə, Xocavənddə, Əsgəranda, Xocalıda
dalğalanır. Dövlətimizin başçısı cənab İlham Əliyevə bu misilsiz xidmətlərinə görə,
sonsuz təşəkkürlər edirik”.
Həmçinin tədbirdə çıxış edən Elektroenergetika və Elektrotexnika Sənayesi İşçiləri
Həmkarlar İttifaqı Respublika Komitəsinin sədri Musa Mirzəyev, Milli Elmlər
Akademiyası Azad Həmkarlar İttifaqının sədri Habil Qurbanov və Dəmiryolçularının
Müstəqil Həmkarlar İttifaqı Respublika Komitəsinin sədri Vaqif Bədəlov çıxış edərək
Azərbaycanın müstəqillik tarixindən, Ulu Öndərin xilaskarlıq missiyasından,
dövlətimizin başçısı cənab İlham Əliyevin rəhbərliyi ilə müstəqilliyimizin daha da
möhkəmləndirilməsi istiqamətində görülmüş işlərdən danışıblar.