Nəhəng enerji obyekti

 Prezident İlham Əliyev cari ilin 26 oktyabr tarixində 230 MVt gücündə Qaradağ Günəş Elektrik Stansiyasının rəsmi açılış mərasimində çıxışnda deyib ki, Azərbaycan xarici investisiyalar üçün çox açıq ölkədir. Son 30 il ərzində bizim çoxmilyardlı investisiya portfelimiz olub. Azərbaycana ümumi investisiyalar 300 milyard ABŞ dollarından çox olub və bunun təqribən 200 milyard ABŞ dolları qeyri-neft sektorunun payına düşür.
Qaradağ Günəş Elektrik Stansiyası Xəzər regionunda və MDB məkanında ən böyük günəş elektrik stansiyasıdır. Stansiya 262 milyon ABŞ dolları dəyərində xarici sərmayə hesabına tikilib. Ölkəmizdə xarici investisiya cəlb edilməklə reallaşdırılan sənaye miqyaslı ilk günəş elektrik stansiyasıdır.
Stansiyada hər il 500 milyon kilovat-saat elektrik enerjisi istehsal edilməklə 110 milyon kubmetr həcmində təbii qaza qənaət ediləcək. Eyni zamanda, atmosferə atılan karbon emissiyası 200 min ton azaldılacaq. 550 hektar ərazini əhatə edən elektrik stansiyada 570 min günəş paneli quraşdırılıb. Bu stansiyanın şəbəkəyə qoşulması üçün 330 kilovoltluq yarımstansiya tikilib.
Qaradağ Günəş Elektrik Stansiyası son illər ərzində inşa edilənən böyük enerji obyektlərindən biridir. Bundan qabaq “Yaşma” yarımstansiyası, “Qobu” Enerji Qovşağı və bu kimi digər obyektlərdə aparılan işləri hər kəs görür, cəmi bir neçə ay ərzində Azərbaycanda enerji sahəsində nə qədər böyük işlər görülür. Əlbəttə, bu nəhəng enerji obyektlərinin inşası zaman tələb edir. Ancaq ən qısa mümkün vaxt kəsiyində belə nəhəng enerji obyektlərinin inşa edilməsi bizim güclü imkanlarımızdan xəbər verir.
Bərpaolunan enerji mənbələrini istehsal edən investorların özlərini tamamilə rahat hiss etməsi üçün maliyyə resurslarının ayrıldığını qeyd edən ölkə başçısı bildirib ki, “bizim bərpaolunan enerji gündəliyimiz təkcə günəş və ya külək elektrik stansiyaları ilə məhdudlaşmır. Hazırda biz üç il bundan əvvəl işğaldan azad edilmiş Qarabağın və Şərqi Zəngəzurun ərazilərində hidroenerji potensialımızı fəal şəkildə inkişaf etdiririk. Biz artıq 170 meqavat gücündə olan hidroelektrik stansiyalarını istismara vermişik və bu ilin sonuna kimi bu, 270 meqavata çatacaq. İki-üç ildən sonra hidroelektrik stansiyaların gücü 500 meqavat olacaq.
Bu da yaşıl enerjiyə keçid prosesinə digər mühüm bir töhfə olacaqdır. Bu mühüm hadisə haqqında çox danışmaq olar, çoxlu sayda mülahizılər yürütmək mümkündür. Görünən odur ki, ölkədəki sabitlik və qonşu dövlətlərin enerjiyə artan tələbatı Azərbaycanın enerji sektoruna sərmayə qoyuluşu ilə bağlı marağı stimullaşdırır. Qloballaşan dünyada bundan prioritet istiqamət yoxdur.

Meyxoş Abdullayev,
Azərbaycan Yazıçılar Birliyinin üzvü