Füzuli rayonunda şəhidlərin xatirəsinə abidə kompleksi açıldı - Foto

12:32 11-01-2021 | 2172

Yanvarın 7-də Füzuli rayonunun Böyük Bəhmənli kəndində Rayon İcra Hakimiyyətinin və kənd sakinlərinin təşəbbüsü və birgə dəstəyi ilə Birinci Qarabağ müharibəsində və Vətən Müharibəsində iştirak etmiş, Böyük Bəhmənli kəndindən olan 38 nəfər şəhidin xatirəsinin əbədiləşdirilməsi məqsədi ilə inşa edilmiş "Bulaq" abidə kompleksinin açılışı olub.

Açılışda rayon İcra Hakimiyyətinin başçısı, pandemiya şəraitinin tələblərinə uyğun olaraq Böyük Bəhmənli kəndinin ziyalılarından və ağsaqqallardan bir qrup və şəhid ailələri iştirak edib.

Rayon İcra Hakimiyyətinin başçısı Alı Alıyev tərəfindən "Bulaq" abidə kompleksinin önünə əklil qoyulub və şəhidlərin xatirəsi bir dəqiqəlik sükutla yad edilib.

Alı Alıyev şəhid ailələri ilə söhbət edib: “Şəhid ailələri və qazilər Prezident-Ali Baş Komandan İlham Əliyevin və Birinci Vitse-prezident Mehriban Əliyevanın diqqət mərkəzindədir. Problemlərin həlli üçün müvafiq dövlət qurumlarına aidiyyəti tapşırıqlar verilib”.

Pandemiya şəraitinin tələblərinə uyğun olaraq şəhid ailələrini növbəli şəkildə dinləyən rayon rəhbəri onları narahat edən məsələlərin həlli üçün yerində müvafiq tapşırıqlar verib.