Çingiz Hüseynzadə EOC İcraiyyə Komitəsinə yenidən namizəd olmadı

01:44 17-03-2021 | 2140

Avropa Olimpiya Komitəsinin (EOC) rəhbər heyətinə növbəti müddət üçün namizədlər açıqlanıb.

Növbəti 4 il müddətinə EOC-un prezidenti vəzifəsinə danimarkalı Nils Niqard və yunanıstanlı Spiros Kapralosun namizədliyi irəli sürülüb.

Litvalı Dayna Qudzineviçyute vitse-prezident, italiyalı Raffaele Panyotsi və slovakiyalı Jozef Liba baş katib, avstriyalı Peter Mennel isə xəzinədar vəzifəsinə iddia edir.

Daha 18 şəxs isə İcraiyyə Komitəsi üzvlüyü üçün qeydiyyatdan keçib. Bunların arasında türkiyəli biznesmen və idman fuksioneri Hasan Arat da var.

Əvəzində Azərbaycan Milli Olimpiya Komitəsinin vitse-prezidenti Çingiz Hüseynzadənin adı siyahıda yoxdur. Hüseynzadə "Report"a açıqlamasında bu dəfə namizədliyini irəli sürmədiyini bildirib. O, Olimpiya Oyunları komissiyasının rəhbəri kimi qalacağını sözlərinə əlavə edib.

Qeyd edək ki, Çingiz Hüseynzadə 2013-cü ildən EOC İcraiyyə Komitəsinin üzvüdür. Növbəti seçkinin 10 - 11 iyunda Yunanıstanın paytaxtı Afinadakı EOC Baş Assambleyasında keçirilməsi nəzərdə tutulurdu. Lakin toplantı koronavirus pandemiyası ilə bağlı vəziyyət üzündən qeyri-müəyyən müddətə təxirə salınıb.