“Mingəçevir Reqatası-2023”: son günün proqramı müəyyənləşib

10:22 27-10-2023 | 781

Gənclər və İdman Nazirliyi, Azərbaycan Kanoe və Avarçəkmə Federasiyasının birgə təşkilatçılığı ilə keçirilən akademik avarçəkmə, kayak və kanoe üzrə “Mingəçevir Reqatası-2023” beynəlxalq turnirində son günün proqramı açıqlanıb.

8 ölkədən 14 komandanın iştirakı ilə keçirilən yarışda idmançılar bu gün 3 yaş qrupunda mübarizə aparacaqlar.

2005-2006, 2007-2008 və 2009-2010-cu il təvəllüdlü idmançılar qüvvələrini sınayacaqlar. Onlar bir və iki nəfərlik kayak qayığında 200 və 500 metr məsafəyə yarışlarda iştirak edəcəklər. 4 nəfərlik avarçəkmə qayığında isə 1500 metr məsafəyə nümunəvi çıxışlar olacaq.

Turnirin ilk iki günündə Azərbaycan idmançıları 16 medal (5 qızıl, 5 gümüş, 6 bürünc) qazanıblar.

Qeyd edək ki, “Mingəçevir Reqatası-2023” beynəlxalq turniri ardıcıl iki ildir Avropa Kanoe Assosiasiyasının təqvim planına daxil edilir.